Shqipëria dhe Greqia kanë rënë dakord të rinovojnë një marrëveshje për forcimin e bashkëpunimit dypalësh në fushën e Emergjencave Civile, në një kohë që të dy vendet kanë nisur të përballen me problematika të tilla si zjarret dhe ndërkohë që vendi ynë është i vendosur për të rritur dhe modernizuar kapacitetet reaguese.

Në vijim të vizitës zyrtare dyditore në Greqi, ministri i Mbrojtjes, Niko Peleshi u prit edhe nga zëvendësministri i Mbrojtjes Civile dhe Emergjencat Klimaterike.

Ministri Peleshi falënderoi vendin fqinj për mbështetjen e dhënë në rastin e tërmetit tragjik të vitit 2019, gjatë pandemisë së COVID-19 si dhe në ndihmën për fikjen e vatrave të zjarrit në vendin tonë, jo vetëm gjatë verës së shkuar, por edhe për ndihmën e dhënë përmes Mekanizmit të Mbrojtjes Civile të BE në shuarjen e zjarrit në Sazan.

Në të njëjtën kohë, z. Peleshi shpalosi synimet e Ministrisë së Mbrojtjes për të rritur kapacitetet në fushën e Emergjencave Civile si dhe shprehu vlerësimin e tij për kontributin e Greqisë në këtë drejtim.